Nah 1 | NdeIBE | STEP | Isiqalekiso ngeNineve. Incwadi yombono kaNahume um-Elikhoshi.

Nahum 1

1 Isiqalekiso ngeNineve. Incwadi yombono kaNahume um-Elikhoshi.

Ulaka LukaJehova NgeNineve

2 UJehova uNkulunkulu olobukhwele lophindiselayo; uJehova uyaphindisela njalo ulolaka olukhulu. UJehova uyaphindisela ezitheni zakhe aqinise lolaka lwakhe ezitheni zakhe.

3 UJehova uyaphuza ukuthukuthela njalo ulamandla amakhulu; uJehova kayikumyekela olecala engajeziswanga. Indlela yakhe iphakathi kwesivunguzane lesiphepho, amayezi aluthuli lwezinyawo zakhe.

4 Ukhuza ulwandle alomise; wenza yonke imifula itshe. IBhashani leKhameli kuyabuna lemiqhakazo yaseLebhanoni ibune.

5 Izintaba ziyanyikinyeka phambi kwakhe, lamaqaqa ayancibilika. Umhlaba uyagedezela ngobukhona bakhe, umhlaba labo bonke abahlala kuwo.

6 Ngubani ongamelana lentukuthelo yakhe na? Ngubani ongalumela ulaka lwakhe oluvuthayo na? Ulaka lwakhe luthululeka njengomlilo; amadwala ayaqhekezeka phambi kwakhe.

7 UJehova ulungile, uyisiphephelo ezikhathini zokuhlupheka. Uyabakhathalela abathembele kuye,

8 kodwa ngesikhukhula esikhulu uzatshabalalisa iNineve; uzaxotshela izitha zakhe emnyameni.

9 Loba engamacebo bani abawenza ngoJehova, uzawaqeda; ukuhlupheka akuyikubuya kabili.

10 Bazathandeleka phakathi kwameva, bedakwe liwayini labo; bazaqothulwa njengenhlanga ezomileyo.

11 Wena Nineve, kuwe sekufike lowo oceba okubi ngoJehova, eluleke okubi.

12 Nanku okutshiwo nguJehova: “Lanxa belababambene labo njalo bebanengi, bazaqothulwa banyamalale. Lanxa ngikuhluphile, wena Juda, kangisayikukuhlupha futhi.

13 Khathesi ngizakwephula ijogwe labo elisentanyeni yakho, ngiqamule lamaketane akho.”

14 UJehova usekhuphe ilizwi ngawe Nineve elithi, “Kawuyikuba lezizukulwane ezibizwa ngebizo lakho. Izifanekiso ezibaziweyo lezithombe ezibunjiweyo ezisethempelini labonkulunkulu bakho, ngizazichitha. Ngizalungisa ingcwaba lakho, ngoba ungcolile.”

15 Khangela ezintabeni le, izinyawo zalowo oletha izindaba ezinhle, omemezela ukuthula! Gcina imikhosi yakho we Juda, ugcwalise lezifungo zakho. Ababi kabasayikukuhlasela futhi; bazachithwa ngokupheleleyo.